(ភ្នំពេញ)៖ នំចាម្ប៍ និងសិល្បៈចម្រៀងវាយស្គរបែបបុរាណប្រពៃណីជនជាតិចាម្ប៍តាំងបូរាណកាលមក ត្រូវបានក្រុមយុវជនវប្បធម៌ចាម្ប៍បានរៀបចំតាំងបង្ហាញ និងប្រគុំយ៉ាងពិរោះរណ្ដុំ នៅមជ្ឈមណ្ឌលបុប្ផាណា កាលថ្ងៃទី៧ ខែធ្នូ ឆ្នាំ២០២៤ ។ ការដាក់តាំងបង្ហាញនេះ ត្រូវបានគេប្រសិទ្ធនាមថា “ទិវានំប្រពៃណីចាម្ប៍ លើកទី៣ ឆ្នាំ២០២៤ “។ ពួកគេធ្វើឡើងដើម្បីញ៉ាំងឲ្យកូនចាម្ប៍នៅកម្ពជាស្គាល់ពីនំ និងសិល្បៈរបស់ខ្លួនកាន់ងែច្បាស់។
អ្នកស្រី ម៉ៃ សំ តំណាងក្រុមយុវជនចាម្ប៍បានឲ្យថា ការរៀបចំទិវានេះឡើង ក្នុងគោលបំណងដើម្បីផ្សព្វផ្សាយ ថែរក្សាប្រពៃណី និងទំនៀមទម្លាប់របស់សហគមន៍ចាម្ប៍ និងឆ្លុះបញ្ចាំងពីភាពសម្បូរបែបផ្នែកវប្បធម៌ចម្រុះរបស់ប្រទេសកម្ពុជា ដែលកម្ពុជាពិតជាកន្លែងសន្តិភាព សម្បូរសប្បាយ មានវប្បធម៍ចម្រុះល្អឯក ហើយក៍ជាផ្នែកមួយនៃការទាក់ទាញភ្ញៀវទេសចរណ៍មកលេងកម្សាន្ត និងស្គាល់ពីវប្បធម៍សិល្បៈចម្រុះយ៉ាងច្រើន ដែលប្រៀបបាននឹងសួនផ្កាដ៍ស្អាតពោរពេញទៅផ្កាស្រស់ស្អាតគ្រប់ប្រភេទបែបនោះដែរ។
អ្នកស្រីបន្តថា ពួកយើងបាននាំមកនូវការដាក់តាំងបង្ហាញនូវស្នាដៃនំ និងដាក់ឲ្យភ្លក់ពិសារបានសេរីផងដែរនូវនំមួយប្រភេទឈ្មោះថា ធ្វើនំលគ្រាំ និងបង្ហាញនំ៥មុខផ្សេងទៀតដែលនាំយកពីខេត្តកំពង់ឆ្នាំង និងត្បូងឃ្មុំ ដែលសុទ្ធសឹងជានំប្រពៃណីរបស់សហគមន៍ចាម្ប៍តែងធ្វើសម្រាប់ពិសា ពិសេសនៅពេលមានបុណ្យទានសំខាន់ៗ ដែលនំទាំងនោះឈ្មោះថា ៖ នំហៅប៉ាក់ (នំផ្កា), នំតប៉ៃជាល (នំសំបុកចាប), នំតាប៉ៃហ្គាស់, នំក្រាម និងនំលគ្រាំ។
អ្នកស្រីដាក់ក្ដីសង្ឃឹមខ្ពស់ការគាំទ្រ និងសង្ឃឹមថា ថ្នាក់ដឹកនាំនឹងជួយគាំទ្រចំពោះកិច្ចការនេះ ដើម្បីក្រុមការងារនឹងមានលទ្ធភាពរៀបចំពិធីនេះបន្តទៀត និងកាន់តែអធិកអធមជាងមុនផងដែរ៕
