(ដាម៉ាស់)៖ យោធាអ៉ីស្រាអែលដ៍ឃោរឃៅបានផ្ដាច់ជីវិតជនមូស្លីមស្លូតត្រង់ប្រមាណជា១៥នាក់ ដោយប្រើមីស៊ីលបាញ់ពីចម្ងាយ ខណ:ដែលពួកគេកំពុងរស់នៅយ៉ាងត្រដាបត្រដួសក្នុងអគារមួយ ក្រោយរងគ្រោះដោយសារគ្រោះរញ្ជួយដីដ៍ខ្លាំងក្លាកាលពី២សប្ដាហ៍កន្លងទៅ ។
នេះបើយោងតាមប្រព័ន្ធផ្សព្វផ្សាយរដ្ឋស៉ីរី SANA បានរាយការណ៍នៅថ្ងៃអាទិត្យនេះ និងប្រែសម្រួលដោយទីភ្នាក់ងារសារព័ត៌មាន AFP នៅថ្ងៃអាទិត្យ ទី១៩ ខែកុម្ភៈ ឆ្នាំ២០២៣។
ប្រព័ន្ធផ្សព្វផ្សាយរដ្ឋស៉ីរី SANA ដោយផ្អែកលើប្រភពពីក្រុមមន្ត្រីនៃទីបញ្ជាការប៉ូលិលប្រចាំរដ្ឋធានីដាម៉ាស់ ចំនួនអ្នកស្លាប់ និងរងរបួសមិនទាន់ត្រូវបានកំណត់ឱ្យច្បាស់នោះទេ ប៉ុន្តែ អង្គការឃ្លាំមើលសិទ្ធិមនុស្សស៊ីរី (The Syrian Observatory for Human Rights) ឱ្យដឹងថា ការវាយប្រហាររបស់យោធាអ៉ីស្រាលលើអគារមួយ ដែលស្ថិតនៅក្បែរមជ្ឈមណ្ឌលវប្បធម៌ អ៉ីរ៉ង់ បានផ្ដាច់ជីវិតមនុស្សយ៉ាងហោច ១៥នាក់ ដោយគ្រាន់តែសង្ស័យថាក្នុងអគារនេះមានបង្កប់សត្រូវ តែធាតុពិតមានជនស៊ីវិលជាមូស្លីមកំពុងរស់នៅ។
SANA បន្ថែមថា សូរសំឡេងផ្ទុះ ត្រូវបានរាយការណ៍នៅម៉ោង ១២៖៣០នាទីយប់ឈានចូលថ្ងៃ អាទិត្យនេះ (ម៉ោងនៅក្នុងតំបន់)។ ប៉ុន្តែខាងអ៉ីស្រាអែលមិនទាន់បានធ្វើអត្ថាធិប្បាយអ្វីឆ្លើយតបនោះទេ។
គួរបញ្ជាក់ថា ចាប់តាំងពីសង្គ្រាមនៅស៊ីរីផ្ទុះឡើងកាលពីឆ្នាំ២០១១មក អ៉ីស្រាអែលបានដឹកនាំការវាយប្រហារតាមផ្លូវអាកាសរាប់រយលើកនៅលើទឹកដីស៊ីរី ដោយមានគោលដៅចម្បងលើមូលដ្ឋានរបស់កងកម្លាំងស៉ីរី កងជីវពលអ៉ីរ៉ង់ និងកងជីវពលហេសប៊ូលឡាលីបង់ ដែលជាសម្ព័ន្ធមិត្តនៃរដ្ឋាភិបាលលោកប្រធានាធិបតីស៉ីរី អាល់អាសាដ៕
