(អង់ការ៉ា)៖ ពិតជាលើសពីអាណិត ដែលបងប្អូនមូស្លីមបានស្លាប់កើនឡើងលើស ២១,០០០នាក់ហើយ ក្នុងគ្រោះរញ្ជួយផែនដីដ៏សាហាវខ្លាំងក្លាបំផុតមួយ កម្រិត ៧.៨រ៉ិចទ័រដឺលបានវាយប្រហារលើប្រទេសតួរគី និងស៉ីរី កាលពីវេលាទាបភ្លឺ ថ្ងៃចន្ទដើមសប្ដាហ៍កន្លងទៅនេះ។ នេះបើតាមការចេញផ្សាយដោយទីភ្នាក់ងារព័ត៌មាន AFP នៅថ្ងៃសុក្រ ទី១០ ខែកុម្ភៈ ឆ្នាំ២០២៣។
យោងតាមទីភ្នាក់ងារតាមដានគ្រោះរញ្ជួយដីអាមេរិក USGS ចំណុចរំញ័ររបស់គ្រោះរញ្ជួយដីខាងលើស្ថិតនៅក្បែរទីក្រុងមួយឈ្មោះ ហ្កាហ្សៀនតិប (Gaziantep) របស់តួរគីស្ថិត នៅក្បែរព្រំដែន ស៊ីរី ដែលមានមនុស្សរស់នៅប្រហែល២លាននាក់ ហើយវាមានជម្រៅប្រហែល១៨គីឡូម៉ែត្រក្រោមផ្ទៃដី។ ហេតុការណ៍នោះ បានកើតឡើងនៅវេលាម៉ោងខ្ទង់ជាង ៤ទាបភ្លឺថ្ងៃចន្ទ ហើយប៉ុន្មានម៉ោងក្រោយមក ក៏មានរញ្ជួយដីធំមួយទៀតកម្រិត ៧.៦រ៉ិចទ័រកើតឡើងផងដែរ រួមជាមួយការញ័ររញ្ជួយកម្រិតតូចៗបន្តបន្ទាប់ទៀតជាច្រើន។ លើកចុងក្រោយបំផុត ដែលគ្រោះរញ្ជួយដីកម្រិត ៧.៨រ៉ិចទ័រ បានវាយប្រហារចំម្តុំតំបន់នេះ គឺកាលពីឆ្នាំ១៩៣៩ ដែលបានសម្លាប់មនុស្សរហូតដល់ ៣៣,០០០នាក់ នៅក្នុងប្រទេសតួរគី។
អាជ្ញាធរនៅក្នុងប្រទេសតួរគី កាលពីយប់ថ្ងៃព្រហស្បតិ៍សប្ដាហ៍នេះ បានឱ្យដឹងថា ចំនួនអ្នកស្លាប់បានកើនដល់ ១៧,៦៧៤នាក់ ខណៈនៅស៊ីរី ចំនួនអ្នកស្លាប់ក៏ត្រូវបានគេរាយការណ៍ ដែរថាបានកើនដល់ ៣,៣៧៧នាក់ ហើយបូកបញ្ចូលតួលេខទាំងនេះចូលគ្នាធ្វើឱ្យចំនួនអ្នកស្លាប់កើនដល់ ២១,០៥១នាក់។ ក្រៅពីមនុស្សស្លាប់យ៉ាងរង្គាលបែបនេះ អគាររាប់ពាន់ ខ្នងបានដួលរំលំកម្ទេចខ្ទី នៅក្នុងប្រទេសទាំងពីរ ហើយមនុស្សរាប់ម៉ឺននាក់នៅក្នុងប្រទេសទាំង២បានរងរបួសដោយសារគ្រោះរញ្ជួយដីនេះ។ បន្ថែមពីលើនេះ ទំហំខូចខាតបង្កឡើងដោយ គ្រោះរញ្ជួយដីនៅតួកគី ត្រូវបានគេប៉ាន់ស្មានជាបឋមថាគិតជាទឹកប្រាក់លើស ៤ពាន់លានដុល្លារ ខណៈនៅស៊ីរីកំពុងស្ថិតនៅក្រោមការវាយតម្លៃនៅឡើយ។
គួរបញ្ជាក់ថា អង្គការ WHO ក៏ធ្លាប់បានព្រមានដែរថាចំនួនអ្នកស្លាប់អាចនឹងកើនឡើងដល់ ២០,០០០នាក់ ហើយមនុស្សប្រហែលជាង ២៣លាននាក់ នៅក្នុងប្រទេសទាំងពីរ អាចនឹងរងផលប៉ះពាល់ពីគ្រោះរញ្ជួយដីនេះ។ ចំនួនស្លាប់ត្រូវបានគេជឿជាក់ថាអាចនឹងបន្តកើនឡើង ស្របពេលប្រតិបត្តិការជួយសង្គ្រោះនៅតែបន្តធ្វើឡើង ទោះជាមានសង្ឃឹមតិចតួច ក៏ដោយ៕
