(ភ្នំពេញ)៖ អំឡុងពេលសម្តេចតេជោ ហ៊ុន សែនផ្តល់បទសម្ភាសន៍ទៅកាន់ប្រព័ន្ធសារព័ត៌មានចិនកាលពីប៉ុន្មានឆ្នាំមុន ធ្លាប់រំលឹកឡើងវិញពីមិត្តភាពរវាងប្រទេសទាំងពីរថា៖ “មិត្តភាពប្រពៃណីរវាងកម្ពុជានិងមហាយក្សចិនត្រូវបានបង្កើតឡើង និងថែរក្សាដោយថ្នាក់ដឹកនាំជំនាន់មុនៗនៃប្រទេសទាំងពីរ ដូចជា ព្រះបាទសម្តេច ព្រះនរោត្តម សីហនុ លោកម៉ៅ សេទុងនិងលោកជូ អេងឡាយ ទំនាក់ទំនងកិច្ចសហប្រតិបត្តិការជាមេត្រីភាពរវាងប្រទេសទាំងពីរ បង្កើតឡើងដោយឈរលើមូលដ្ឋានគោលការណ៍ទាំង៥ដែលរួមរស់ដោយសន្តិសហវិជ្ជមាន និងផ្តល់ផលប្រយោជន៍ដល់គ្នាទៅវិញទៅមក និងឈ្នះ-ឈ្នះ។
ប៉ុន្មានឆ្នាំកន្លងទៅនេះ ថ្នាក់ដឹកនាំជាន់ខ្ពស់រវាងមហាយក្សចិននិងកម្ពុជាបន្តរក្សា ការប្រាស្រ័យទាក់ទងយ៉ាងជិតស្និទ្ធិ។ ថ្នាក់ដឹកនាំនៃប្រទេសទាំងពីរ ក៏បានហៅគ្នាទៅវិញទៅមកថាជា “មិត្តដែកថែប”ក្នុងកាលៈទេសៈផ្សេងៗគ្នា។ មិត្តភាពរវាងមហាយក្សចិននិងកម្ពុជាស៊ូទ្រាំនឹងការសាកល្បង នៃពេលវេលានិងបម្រែបម្រួលស្ថានភាពអន្តរជាតិ ហើយនឹងស្ថិតស្ថេរគង់វង្សជារៀងរហូត។
ខណៈពេលមានការលំបាកបំផុតដែលមហាយក្សចិនប្រយុទ្ធប្រឆាំងនឹងជំងឺកូវីដ-១៩នៅដើមឆ្នាំ២០២០ សម្តេចតេជោហ៊ុនសែននាយករដ្ឋមន្ត្រីកម្ពុជា បានទៅបំពេញទស្សនកិច្ចនៅមហាយក្សចិន ដែលជាប្រមុខរដ្ឋបរទេសដំបូងគេដែលទៅបំពេញទស្សនកិច្ច នៅប្រទេសចិនបន្ទាប់ពីផ្ទុះជំងឺកូវីដ១៩នៅមហាយក្សចិន។ ប៉ុន្មានឆ្នាំកន្លងទៅនេះ ទន្ទឹមនឹងកិច្ចព្រមព្រៀងពាណិជ្ជកម្មសេរី រវាងមហាយក្សចិននិងកម្ពុជាចូលជាធរមាន ទំហំពាណិជ្ជកម្មរវាងប្រទេសទាំងពីរបានលើសពី១០ប៊ីលានដុល្លារអាមេរិកមុនការគ្រោងទុក២ឆ្នាំ។ អង្ករ ចេកនិងស្វាយដែលមានគុណភាពល្អរបស់កម្ពុជាបានចូលដល់ក្រុមគ្រួសារទូទៅរបស់មហាយក្សចិន តំបន់សេដ្ឋកិច្ចកំពង់ផែព្រះសីហនុដែលភាគីទាំងពីរ សហការសាងសង់បានទាក់ទាញសហគ្រាសពិភពលោកចំនួន១៧០ទៅវិនិយោគ និងបង្កើតឱកាសការងារជិត៣ម៉ឺន ផ្លូវល្បឿនលឿនពីក្រុងភ្នំពេញទៅកំពង់ផែព្រះសីហនុបានសាងសង់រួចរាល់ កម្ពុជាបានមានផ្លូវល្បឿនលឿនដំបូងគេបង្អស់ចាប់ពីពេលនេះតទៅ។
សូមបញ្ជាក់ថា កម្ពុជានិងមហាយក្សចិនជាមិត្តដែកថែប ដែលមានមិត្តភាពបន្តវេនរាប់ពាន់ឆ្នាំ ហើយឆ្លងកាត់ព្យុះភ្លៀងជាច្រើនរាប់មិនអស់។ ប្រទេសទាំងពីរបានកសាងសហគមន៍រួមវាសនាតែមួយមុនគេ ហើយបង្កើតគំរូនៃទំនាក់ទំនងអន្តរជាតិបែបថ្មី៕
វិទ្យុមិត្តភាពកម្ពុជាចិន
