(ភ្នំពេញ)៖ លោក នេត្រ ភក្ដ្រា រដ្ឋមន្ដ្រីក្រសួងព័ត៌មានបានថ្លែងថា ដំណើរការងាររបស់សមាគមមីក្រូហិរញ្ញវត្ថុកម្ពុជាពិតជាមិនអាចខ្វះបាន ព្រោះគ្រឹស្ថានមីក្រូហិរញ្ញវត្ថុបានដើរតួនាទីយ៉ាងសំខាន់ ក្នុងដំណើរការអភិវឌ្ឍសេដ្ឋកិច្ចប្រទេសជាតិ បើសិនគ្មាន មីក្រូហិរញ្ញវត្ថុនោះទេ សហគ្រាសធន់តូច និងមធ្យម SME ក៏ពិបាកនឹងដំណើរការទៅមុខផងដែរ។ ជាមួយនេះ ក្រសួងព័ត៌មាន ក៏បានចាប់យកវិស័យឯកជន ជាដៃគូរដ៏សំខាន់ក្នុងការអភិវឌ្ឍប្រទេស។
លោករដ្ឋមន្ត្រីបានថ្លែងបែបនេះ ក្នុងគ្រាដែលលោករដ្ឋមន្ត្រីបានអនុញ្ញាតឲ្យប្រធានក្រុមប្រឹក្សាភិបាល និងថ្នាក់ដឹកនាំសមាគមមីក្រូហិរញ្ញវត្ថុកម្ពុជា ដឹកនាំដោយលោក សុខ វឿន ប្រធានក្រុមប្រឹក្សាភិបាល សមាគមមីក្រូហិរញ្ញវត្ថុកម្ពុជា (CMA) លោកស្រី ឌិត នីតា អគ្គនាយិកាប្រតិបត្តិ គ្រឹះស្ថានមីក្រូហិរញ្ញវត្ថុ ខេមា (CAMMA) និងជាអនុប្រធានក្រុមប្រឹក្សាភិបាលសមាគម CMA ចូលជួបសំដែងការគួរសមនៅរសៀលថ្ងៃទី១៨ ខែតុលា ឆ្នាំ២០២៣នេះ ។
ក្នុងឱកាសនេះ លោក សុខ វឿន ប្រធានក្រុមប្រឹក្សាភិបាលសមាគម បានជម្រាបជូនអំពីសាវតាសមាគម ស្ថានភាពវិស័យ បញ្ហាប្រឈម សំណូមពរ ព្រមទាំងសុំអនុសាសន៍ ពីលោករដ្ឋមន្ត្រីបន្ថែមសម្រាប់ការអភិវឌ្ឍវិស័យមីក្រូហិរញ្ញវត្ថុនៅក្នុងប្រទេសកម្ពុជា «អតិថិជនក៏ជោគជ័យ ស្ថាប័នធនាគារ និងមីក្រូហិរញ្ញវត្ថុក៏ជោគជ័យ សង្គមក៏ជោគជ័យ» នេះជាការចង់បានទាំងអស់គ្នា។
លោករដ្ឋមន្ត្រី នេត្រ ភក្ត្រា ធ្វើបានការចែករំលែកពីយុទ្ធសាស្ត្រ និងអាទិភាពរបស់ក្រសួងព័ត៌មាន ក្នុងការកែទម្រង់វិស័យព័ត៌មាន និងសោតទស្សន៍ ឲ្យដើរស្របតាមគោលដៅ នៃចក្ខុវិស័យរបស់រាជរដ្ឋាភិបាល និងដំណើរការវិវឌ្ឍរីកចម្រើនរបស់ប្រទេសជាតិ។
លោក នេត្រ ភក្ដ្រា បានលើកឡើងពីសារៈសំខាន់ នៃវិស័យមីក្រូហិរញ្ញវត្ថុ និងបានលើកទឹកចិត្តឲ្យវិស័យនេះ បន្តកិច្ចសហប្រតិបត្តិការឲ្យបានជិតស្និតជាមួយវិស័យផ្សេងៗទៀត ក៏ដូចជាដោះស្រាយបញ្ហាប្រឈមនានា ពិសេសត្រូវធ្វើការផ្សព្វផ្សាយឲ្យបានទូលំលាយ លឿនរហ័ស នូវរាល់សកម្មភាព និងលទ្ធផលការងាររបស់សមាគមមីក្រូហិរញ្ញវត្ថុកម្ពុជា សម្រេចអនុវត្តន៍ និងទិសដៅបន្តទៅមុខទៀត៕
