(អង់ការ៉ា)៖ ក្រោយមានការវាយប្រហារដោយគ្រាប់បែកអត្តឃាតនៅក្បែរក្រសួងមហាផ្ទៃនៃប្រទេសតួកគី ភ្លាមនោះកម្លាំងនគរបាលបានចេញអន្តរាគមន៍ភ្លាមៗដោយចាប់ខ្លួនមនុស្សសង្ស័យយ៉ាងតិច៦៧នាក់នៅទូទាំងប្រទេសតួកគីនៅថ្ងៃអង្គារនេះ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃទី០៤ ខែតុលា ឆ្នាំ២០២៣។
រដ្ឋមន្ត្រីមហាផ្ទៃ លោក Ali Yerlikaya បាននិយាយថា ប៉ូលីសបានធ្វើការវាយឆ្មក់នៅក្នុងខេត្តចំនួន ១៦ របស់ប្រទេសតួកគី ហើយបានចាប់ខ្លួនមនុស្សចំនួន ៥៥នាក់ដែលសង្ស័យថាជាផ្នែករបស់ក្រុមស៊ើបការណ៍ នៃគណបក្សពលករឃឺដ (PKK)។ លោក Yerlikaya បានសរសេរនៅលើប្រព័ន្ធផ្សព្វផ្សាយសង្គមដូច្នេះថា យ៉ាងហោចណាស់មនុស្ស ១២ នាក់ផ្សេងទៀតដែលសង្ស័យថា ជាសមាជិក PKK ត្រូវបានចាប់ខ្លួននៅក្នុងប្រតិបត្តិការដាច់ដោយឡែកមួយ នៅក្នុងខេត្តចំនួន ៥។
គណបក្សពលករឃឺដ (PKK) បាននិងកំពុងដឹកនាំការបះបោរ អស់រយៈពេលជាច្រើនទសវត្សរ៍មកហើយនៅក្នុងប្រទេសតួកគី ហើយត្រូវបានចាត់ទុកថាជាអង្គការភេរវកម្មដោយសហរដ្ឋអាមេរិក និងសហភាពអឺរ៉ុប។ មនុស្សរាប់ម៉ឺននាក់បានស្លាប់ចាប់តាំងពីជម្លោះបានចាប់ផ្តើមនៅឆ្នាំ ១៩៨៤។
គួរបញ្ជាក់ថា កាលពីថ្ងៃអាទិត្យ អ្នកបំផ្ទុះគ្រាប់បែកអត្តឃាតម្នាក់បានបំផ្ទុះគ្រាប់បែក នៅជិតច្រកចូលក្រសួងមហាផ្ទៃ ប៉ុន្មានម៉ោងមុនពេលដែលលោកប្រធានាធិបតី Recep Tayyip Erdogan ត្រូវមកថ្លែងសុន្ទរកថានៅសភាក្រោយឈប់សម្រាករដូវក្តៅ។ អ្នកវាយប្រហារម្នាក់ទៀត ត្រូវបានបាញ់សម្លាប់នៅក្នុងការបាញ់ប្រហារជាមួយប៉ូលីស ខណៈប៉ូលិសពីរនាក់បានរងរបួសស្រាលក្នុងការវាយប្រហារនោះ។
យោងតាមគេហទំព័រព័ត៌មានជិតស្និទ្ធនឹងក្រុមនេះ បានឱ្យដឹងថា គណបក្សពលករឃឺដបានអះអាងទទួលខុសត្រូវចំពោះការវាយប្រហារនេះ ខណៈដែលអាជ្ញាធរតួកគីបានកំណត់អត្តសញ្ញាណអ្នកវាយប្រហារម្នាក់ថាជាអ្នកប្រយុទ្ធ PKK ។ ប៉ុន្មានម៉ោងក្រោយមក កងទ័ពអាកាសតួកគី បានធ្វើការវាយប្រហារតាមអាកាសទៅលើទីតាំងដែលសង្ស័យថា ជាទីតាំងរបស់ PKK នៅភាគខាងជើងប្រទេសអ៊ីរ៉ាក់៕
